Abadaw, Padi Tamen, nakain ka ba?
Maaram ka ba nga kakulop nagbaha hin tuba?
Pebrero 16, 2013 – an Taboan nalukop han kapula…
Pastilan, padi, kun nakadto ka , naglalaway ka gud han kahamot han bahalina.
Halagad, padi, han nananagay na, magpapanulon-tulon ka gud pagsiplat pala nim ha tuba
May masaputok nga mapula-pula, mayda liwat an katin-aw
lupig pa an surudlan nga botelya.
Pero aton la ini padi ha,
Mayda ko nadiskubrihan kakulop gud la.
Ini ngayan nga mga magsiriday ngan han marasa nga tuba,
Abadaw padi, an kamagsangkay di harumamay la.
Bisan ha paniudto dayuday katangka, pirmi gud kaupod han uruistorya.
Kahuman paniudto, nag eleksyon, padi
Ira kuno mga opisyales han hini nga grupo
Mga maniriday han Samar, Bilran, ug Leyte
Nagkakaurusa pag pauswag han literatura dinhi.
Ada, padi, tungod han tagay-tagay di nanhaha-arasya
an mga panudlok.
May nangangalimot han ngaran han iya kasapit
Mayda liwat nabubungul-bungol na,
gin-uutro an ngaran han daan na nominado.
Pag-abot han ligas, padi, di nangagsiday na,
An kada napaprente rosi chiks ngan matawa-tawa
An kada natatawag di gud nakabaribad, nakadto gud han butnga hin pirit
Bisan daw nawawad-an han mga linya nga igpapa-angbit,
Kay karisyuhan man han mga maniriday.
An ira parakpak, padi, nanhahagalpak gud han kalipay
Ngan an karagtatawa, abadaw padi, nanharag-ing kaupay.
Han pagtikang ginsistahan an “Guindumdum Ko Ikaw”,
Mayda nagpa-angbit han iya kaagi han kapobrehan
ngan papangeskwela han iya kabataan,
May usa nag-iningles tungod han mga harok
May usa liwat nga daraga iginsiday an mga kagirok.
Mayda pa gud nanbuking han nananaringsing nga “Dama de Noche” han iya Amay
Abadaw padi, kamakaluluoy han iya nalidong nga Nanay.
Ngan damo pa adto kadurudilain la.
May naruruyag pagsaka bukid han Panamao,
Mayda liwat nagpaukoy hin bisita nga labnaw
An iba ginpalid na ha ak’ panumdum
Basta an ak’ natitigamnan na la nga ha kada siday
hi Ma’am Merlie napakpak ngan baga napapahiyum.
Porbida, padi Tamen, kun nakadto ka, nakagkanta ka gud
han im’ paborito nga “Matud Nila”.
Abadaw padi, an abre nga galonan han bahalina
di ka gud maantos, malag-ok ka man ta.
Pero maupay na la nga nakadto ka ha hirayo nga Baryo han Magsaysay
Kay bangin ka pa nagsudoy han im’ tim song nga “Agway!”
2/17/13 mbcl
Read Full Post »
